Amakhosi angenele kolwemfuyo ewuvanzi
Lomkhankaso obizwa nge-Operation uMelusi, wethulwe umkhuzi wamaphoyisa alesi sifunda, uMajor–General Thami Ntuli, ehholo lamakhosi eShowe, ngesonto eledlule
AMAKHOSI akhele isifunda saseKing Cetshwayo awemukele ngezandla ezimhlophe umkhankaso wamaphoyisa wokulwisana nesihlava sokusabalala kwezinkomo emigwaqeni yakuleli.
Lokhu sekudale inqwaba yezingozi zomgwaqo, ezedlule nemiphefumulo yabantu abaningi.
Lomkhankaso obizwa nge-Operation uMelusi, wethulwe umkhuzi wamaphoyisa alesi sifunda, uMajor–General Thami Ntuli, ehholo lamakhosi eShowe, ngesonto eledlule.
Inhloso enkulu yalomkhankaso ukubhekana ngqo nezikhalazo ezivela kubashayeli bezomoto kanye nabanikazi bamapulazi, abakhalaza ngezinkomo, izimbuzi, izimbongolo kanye nezimvu eseziphendule imigwaqo emikhulu yalesi sifunda izibaya zazo namadlelo.
Losigaxa mabhande utshele amakhosi ngobungozi obudalwa ilezi zilwane, njengoba sekubikwe izingozi eziningi ezidalwa ilezi zilwane.
Ubuye wanxenxa amakhosi ukuba adlale indima enkulu kulomkhankaso, ngokuxoxisane nemiphakathi ngendaba yalemfuyo engeluswa.
uMkhulumeli wamaphoyisa kulesi sifunda, uKaputeni Mbongeni Mdlalose, uthi lemfuyo ewuvanzi emgwaqeni isidale inqwaba yezingozi.
Uthi imigwaqo efana no R66, R34, P 230 no P50, iyona ethinteka kakhulu.
Ube esenxusa bonke abafuyile ukuba bakhulumisane nabalusi bemfuyo ukuba baqaphele ngokweqile.
‘Abalimi nabo bakhala esifanayo ngalemfuyo ewuvanzi, ngoba ingena emasimini abo idle izitshalo zabo, nokuyinto egcina isiholele ekutheni abalimi begcine sebediliza abasebenzi, ngoba ungasekho umsebenzi abazowenza njengoba lemfuyo isuke seyimoshile.
Kunamapulazi aseMfule, eMthonjaneni naseNkwalini asephenduke izisulu zalemfuyo ewuvanzi,’kubeka uMdlalose.
Ekhuluma egameni lamakhosi, Inkosi Phiwayinkosi Biyela, ithe bona njengamakhosi baluthakasela kakhulu loluhleo lwamaphoyisa, futhi balwemukela ngezandla zombili.
‘Sesikuqaphelile ukuthi kunabanikazi bemfuyo ababudedengu, abakwazi ukwazi ukunakekela imfuyo yabo ngendlela efanelekile, okuphetha ngokuthi lemfuyo igcine seyibanga izingozi emigwaqeni kufe abantu.
‘Sizoba nomhlangano nezinduna, lapho sizobhunga khona loludaba, ezinye zeziphakamiso esizozibheka ukuthi sicele izinduna ukuba ziziqoqe izinkomo ezitholakala emgwaqeni, bese sixwayisa abaninizo, ngokuthi uma ziphinda zitholakale emgwaqeni, sesiyobahlawulisa,’ kubeka iNkosi Biyela.
• Amakhosi embrace cattle control campaign
HAVE YOUR SAY
Like our Facebook page and follow us on Twitter.
For news straight to your phone invite us:
WhatsApp – 072 069 4169
Instagram – zululand_observer
