Ulengela eweni uMasipala waseMtubatuba
uNkk. Nomusa Dube-Ncube uthe lomasipala, owahlakazwa ngo-February 2015 ngenxa yezenzo zenkohlakalo, usuyakhombisa futhi izimpawu zokungasebenzi, futhi inqubo yokusebenza kwawo ilengela eweni
IMIKHONYOVU yezabelo zimali, ukwenyuswa kwemiholo yamaKhansela ngaphandle kwemvume, izingxabano zangaphakathi, ukudutshwa kwemihlangano, nezinsolo zokwesabela otokoloshe, ngezinye zezinto ezikhathazayo eziphakanyiswe nguhulumeni wesifundazwe, ngemuva kokuhambela kwazo kulomasipala kungalindele muntu, kamuva nje.
Lezi zinkinga, ikakhulukazi eyokulwa kwangaphakathi nokudutshwa kwemihlangano, ishiywe phakathi sezivimbele umkhandlu ukuba ubambe imihlangano yawo kusukela ngo-October wangonyaka odlule, nokuthi lomkhandlu uthathe izinqubo ezibalulekile.Lokhu kukhathazeka kuvezwe nguNgqongqoahe Wezokubusa ngokubambisana Nabaholi Bomdabu, uNkk. Nomusa Dube-Ncube, ngoLwesine.
Uthe lomasipala, owahlakazwa ngo-February 2015 ngenxa yezenzo zenkohlakalo, usuyakhombisa futhi izimpawu zokungasebenzi, futhi inqubo yokusebenza kwawo ilengela eweni.
UDube-Ncube usesabise ngokuthathela lomasipala izinyathelo ezinqala, ukuze abuyise uzinzo, nenqubo yokusebenza.
Izikhalo ezivezwe ngamakhansela, zihlanganisa abasebenzi abathatha izinqumo bazisebenzise ngaphandle kwemvume yomkhandlu, kube wukungahlinzekwa ngamathuluzi okusebenza, ukungakwazi ukuxhumana kanye nokungahlali kwamakomidi abalulekile.
Izikhundla eziningi eziphezulu kulomasipala, abantu babambile kuzo, abaqashiwe ngokugcwele.
‘Sikhathazekile ngemibiko yokuthi naphezu kokungakwazi ukuhlala komkhandlu, kunezinye izinqumo ezithathiwe, futhi iningi lazo zibucayi,’ kuchaza uDube-Ncube.
‘Lesabelo zimali sikamasipala esisanda kuphasiswa, uma ngenza ngaso isibonelo, siwumkhonyovu, futhi nokwenyuswa kwemiholo yamakhansela ngaphandle kwezinqumo zomkhandlu, nakho akukho emthethweni.
Kuyasolakala ukuthi imoto yeMeya, yayekwa ukusetshenziswa ngokwesabela izinsolo zokuthakatha, nokuthi lemoto yayifakwe otokoloshe.
IMeya uGumede, nokho ikuchithile lokhu. Ithe lemoto yayisiyedlule ebangeni lika 110 000km.
‘Sesitshelwe nangezinsolo ezibucayi zokuthi amaholo abasebenzi awathathwanga kwisabelozimali semisebenzi kaMasipala waseMtubatuba, kodwa sithathwe ezimalini ezibekelwe imisebenzi yengqalasizinda yomphakathi (MIG).
‘Sengijube ithimba lezikhulu zomnyango ukuba ziphenye lezi zinsolo, ukuze uma zitholakala ukuthi ziyiqiniso, kuzomele zinqandwe.
‘Ngihlaba ikhwelo kuwo wonke amakhansela ukuba asebenze ngokubambisana, ngenhloso yokuzuzisa umkhandlu nabantu bonke bakamasipala.
‘Labo abasemandleni akumele bawasebenzise budlabha, futhi namakhansela akumele aphazamise ukusebenza komkhandlu.’
UNgqongqoshe uthe, uma izidingo zikamasipala zinganakwa, lomasipala ungabuye uguqe ngamadolo futhi.
Usezibophezele ngokubuyela eMtubatuba, ukuba ayoxazulula lezi zinkinga ezikhona.
Mtubatuba Municipality faces collapse
HAVE YOUR SAY
Like our Facebook page and follow us on Twitter.
For news straight to your phone invite us:
WhatsApp – 072 069 4169
Instagram – zululand_observer
