Isililo kushona uqweqwe lwentatheli
Ushone ngoLwesihlanu olwedlule, ngemuva kokugula izinyanga ezimbili, elele esibhedlela
Ugqemeke engeqiwa ntwala umkhakha wezindaba, kulandela ukwedlula emhlabeni kogalagala lwentatheli, obelungumazulazayithole uMnuz. Thando Ndlovu.
UGatsheni njengoba kade aziwa kanjalo kwabaningi, ubesebenzela inkampani ye-Zululand Observer, enamaphephandaba amaningi ngaphansi kwawo, kubalwa ne Eyethu Bay Watch.
Ushone ngoLwesihlanu olwedlule, ngemuva kokugula izinyanga ezimbili, elele esibhedlela.
Uqale ukusebenza ophikweni lwezindaba kulenkampani, ngonyaka ka-2015, kanti ngaphambilini uke wasebenzela imisakazo yomphakathi.
UMhleli omkhulu we-Zululand Observer, uMnuz Dave Savides, uchaze uGatsheni njengomuntu obenogqozi nentshisekelo ngomsebenzi wakhe.
‘Awukho umsebenzi abesaba ukuwenza, noma obethi ungaphezu kwamandla akhe. Ebehlale ebeka umsebenzi wakhe phambili, ngaso sonke isikhathi.
‘UThando ebehlale ekulungele ukusebenza noma ngasiphi isikhathi sosuku. Ebewuzakwethu esisebenze naye isikhathi eside, ewumfowethu, ewumngani wethu. Sohlala simkhumbula njalo,’ kubeka u-Savides.
Phakathi kwabantu asebebhongele emswaneni ngokwedlula kukaGatsheni emhlabeni, wuMasipala waseMhlathuze.Umkhulumeli walomasipala, uMnuz. Mdu Ncalane, usedlulisele amazwi enduduzo emndenini nakozakwabo bakaNdlovu.
‘UMnuz. Ndlovu udlale indima enkulu kulomasipala. Ube yizwi labantu baseMandlanzini, lapho ebehlala khona, ebuye abasize ngentuthiko ebiyenziwa ngumasipala kuleyandawo.
‘Akusikho nje ukuthi i-Zululand Obsever ilahlekelwe intatheli, kodwa abantu baseMandlanzini nezakhamuzi zonke ezingaphansi kwalomasipala zilahlekelwe kakhulu.
‘Siwumasipala sikholelwa ukuthi abezindaba badlala indima enkulu ngokubikela izakhamizi ngentuthuko eyenzeka emphakathini,’ kubeka uNcalane.
UGatsheni uzobekwa endlini yakhe yokugcina eRichards Bay, emathuneni ase-Aquadene ngeSabatha, emva kwenkozo yomngcwabo ezoba sekhaya, eMandlanzini kusukela ngehora leshumi.
Thando to be laid to rest on Saturday
HAVE YOUR SAY
Like our Facebook page and follow us on Twitter.
For news straight to your phone invite us:
WhatsApp – 072 069 4169
Instagram – zululand_observer
